Gonxhja: Vijojnë punimet për restaurimin e mureve antike në Durrës

Në Durrës vijojnë punimet për restaurimin e mureve antike të zbuluara pranë shkollës 9-vjeçare “Eftali Koçi”, si dhe rehabilitimi i zonës përreth.

Ky projekt është hartuar dhe financuar nga Instituti Kombëtar i Trashëgimisë Kulturore (IKTK).

Ministri i Turizmit, Kulturës dhe Sportit, Blendi Gonxhja bëri të ditur se “zbulimet arkeologjike të vitit 2022 nxorën në dritë pjesë të sistemit fortifikues të qytetit antik, së bashku me struktura të tjera me vlera të veçanta, si puse dhe mbetje të një akuadukti romak, që dëshmojnë zhvillimin urban të Durrësit ndër shekuj”.

“Ky investim i IKTK-së synon ruajtjen dhe valorizimin e këtyre strukturave arkeologjike, duke i integruar ato në hapësirën urbane si një pasuri e aksesueshme dhe e qëndrueshme për qytetarët dhe vizitorët”, tha Gonxhja.

Ky zbulim arkeologjik ka dalë në dritë gjatë gërmimeve të bëra në territorin e shkollës 9-vjeçare “Eftali Koçi”, e cila do të rindërtohej nga e para, pas dëmtimeve të marra nga tërmeti. Zbulimi arkeologjik daton në periudhën e shek. IV-III para Krishtit.