Grabitje e bujshme në Francë, vidhet “Apokalipsi” i Dali, libri unik dhe më i çmuar në botë!

Një tjetër vjedhje e bujshme godet muzetë francezë: persona të paidentifikuar hynë në Qendrën e Artit Bashkëkohor në Issoire, në Auvergne, dhe vodhën “L’Apocalypse”, një vepër monumentale me peshë 210 kilogramë, e zbukuruar me ar dhe gurë të çmuar dhe me vlerë disa milionë euro.

Dikur ajo cilësohej si “libri më i çmuar në botë”. Vetëm kopertina prej bronzi, e realizuar nga Salvador Dalí, peshon 150 kilogramë.

Vepra u konceptua dhe porosit në vitin 1959 nga botuesi i librave të artit Joseph Forêt, bazuar në “Apokalipsin” e Shën Gjonit.

Në realizimin e saj morën pjesë shtatë artistë të njohur, mes tyre Dalí, Georges Mathieu, Bernard Buffet dhe Leonor Fini, ndërsa shtatë shkrimtarë e mendimtarë, përfshirë Jean Cocteau, Emil Cioran dhe Ernst Jünger, kontribuuan me komente dhe reflektime.

Prej vitit 1961, “L’Apocalypse” është ekspozuar në vende të ndryshme të botës. Pas disa pronarëve, në vitin 2002 u ble nga koleksionisti Christian Karoutzos, i cili ka treguar se iu deshën dhjetë vjet për ta paguar, duke punuar shtatë ditë në javë.

Vlera e saj arrin në disa milionë euro. Pas 24 vjetësh, këtë verë Karoutzos vendosi ta ekspozonte veprën në Qendrën e tij të Artit Bashkëkohor. Vetëm pak muaj më vonë ajo u vodh.

Autoritetet franceze kanë hapur një hetim.

“Është një vepër unike në botë. Kanë vrarë trashëgiminë franceze, kanë vrarë Francën”, deklaroi pronari i saj.