Gruaja e dyshuar për shpërthimin me parcelë në Monaco u gjet e vdekur në Ukrainë

Autoritetet ukrainase thanë se trupi i 39-vjeçares Anastasiia Berezovska, e dyshuar për vendosjen e një bombe-parcele në hollin e një pallati në Monaco më 29 qershor, u gjet i vrarë në Ukrainë me plagë nga arma e zjarrit në kokë. Sulmi shkaktoi lëndime te tre persona, mes të cilëve një shumëmilioner i sanksionuar ukrainas dhe anëtarë të familjes së tij, dhe pas tij nisi një kërkim ndërkufitar për të.

Interpol kishte lëshuar një njoftim të kuq për kapjen e saj, ndërsa, raporton bbc.co, hetuesit thanë se Berezovska ishte kthyer në Ukrainë më 1 korrik dhe kishte komunikuar atje me familjen dhe me dy burra — një ish-polic dhe një oficer aktual të Drejtorisë Kryesore të Zbulimit në Ministrinë e Mbrojtjes. Sipas hetimeve, dy të dyshuarit u përfshinë në hetime si bashkëpunëtorë të mundshëm pasi rezultonte se kishin transferuar vazhdimisht fonde në llogaritë e saj bankare dhe kripto.

Agjencia e sigurisë (SBU) njoftoi se oficeri i inteligjencës pranoi më vonë se kishte marrë pjesë në vrasjen e Berezovskës dhe deklaroi se kishte vepruar së bashku me një tjetër të dyshuar. Gjatë kontrolleve në banesën e ish-policit u gjet një dhomë në bodrum që ngjante me një vend torturimi. Të dy personat u ndaluan nën dyshimin për vrasje me paramendim në grup.

Zyra e prokurorit në Monaco tha se vajza kishte shpenzuar ditë duke vëzhguar banesën dhe se gjatë aktit të sulmit ishte maskuar si burrë. Shpërthimi ndodhi pak pas orës 21:00 lokale dhe lëndoi tre persona, dy prej të cilëve rëndë. Hetuesit besojnë se ajo u largua me makinë me qira për në Itali dhe më pas për në Gjermani; forcat speciale kontrolluan një apartament të marë me qira në shtetin qendror të Hesse-s.

Hetimet vazhdojnë dhe autoritetet thonë se do të japin më shumë detaje teksa përpunojnë provat, sipas bbc.co.