Guljelm Radoja, aktori i paharruar i shumë roleve në kinematografi e teatër

Më 2 korrik 1945, lindi në Shkodër aktori i mirënjohur i skenës dhe ekranit, Guljelm Radoja.

Studimet e larta i përfundoi në Institutin e Lartë të Arteve (sot Universiteti i Arteve) për Dramaturgji (1972). Fillimisht punoi si aktor profesionist në Teatrin e Librazhdit. Më pas largohet nga ky teatër për të punuar si aktor dhe regjisor pranë Teatrit “Bylis” të qytetit të Fierit dhe më pas si aktor në Teatrin “Aleksandër Moisiu” për t’u rikthyer në Teatrin Kombëtar në vitin 1996.

Guljelm Radoja pati një veprimtari të shkëlqyer në kinematografi ku interpretoi në rreth 40 filma nga viti 1970 deri në vitin 2019. Nga filmat mbetet i paharrueshëm në interpretimet me rolet e Stefan Bardhit te “Mësonjëtorja” (1979), Petro Nini Luarasit te “Kush vdes në këmbë” (1984) apo roli i Albertos te “Gjeneral Gramafoni” (1977), prifti italian te “Kthimi i ushtrisë së vdekur” (1989) i Anagnostit.

Vështrimi i tij magnetik u shua në 5 maj të vitit 2021, pasi u prek nga Covid-19. Guljelm Radoja ishte vlerësuar me titujt “Artist i Merituar” dhe “Mjeshtër i Madh”.