Haxhiu e përcjell për dekretim te presidentja Ligjin për Dhomat e Specializuara

Kryetarja e Kuvendit të Kosovës, Albulena Haxhiu, e ka nënshkruar Ligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar dhe ia ka përcjellë atë presidentes Justina Shiroka-Pula për dekretim, siç njofton Indeksonline.

Konfirmimi ka ardhur nga këshilltari i kryetares së Kuvendit, Glauk Tahiri, i cili për televizionin Dukagjini ka bërë të ditur se ligji, i miratuar në seancën plenare të 6 tetorit, i është përcjellë presidentes në mbështetje të nenit 80, paragrafi 2, të Kushtetutës së Republikës së Kosovës. Lajmin e ka raportuar edhe KOHA.

Sipas Kushtetutës, presidentja ka tani në dispozicion tetë ditë afat për ta dekretuar ligjin, pas së cilës ai hyn në fuqi, ose për ta kthyer atë në Kuvend për rishqyrtim.

Procedimi vjen në ditën kur, në seancën e sotme plenare, kryetari i PDK-së, Bedri Hamza, kërkoi që ligji t’i dërgohej pa vonesa presidentes për dekretim, duke shprehur besimin se ajo do ta nënshkruajë atë. Hamza kujtoi se ndryshimet ligjore u miratuan me 88 vota të deputetëve, ndërsa rezoluta përkatëse me 99 vota.

Ndryshimet, të miratuara pas aktgjykimit ndaj ish-krerëve të UÇK-së në Hagë, kufizojnë juridiksionin e Dhomave të Specializuara. Nga Kuvendi është bërë e ditur se brenda afatit të paraparë për ankesa nuk ishte paraqitur asnjë e tillë, çka i hapi rrugë nënshkrimit dhe përcjelljes së ligjit te presidentja.