HUNGARI – Berlini kërkon aleance të re pas ndryshimit të qeverisë

BERLIN, 14 shtator /ATSH-DPA/ – Ministri i Jashtëm gjerman Johann Wadephul mbërriti sot në Budapest për një vizitë zyrtare, me shpresën se, pas ndryshimit të qeverisë në fillim të këtij viti, “Hungaria do të rigjejë zemrën e saj të madhe evropiane“.

Kryeministri konservator Peter Magyar mposhti populistin e djathtë Viktor Orban në zgjedhjet e prillit, pas 16 vitesh në pushtet të këtij të fundit.

Qeveria e Orbanit kishte ndjekur politika më miqësore ndaj Moskës, ndërsa pengonte sanksionet e BE-së dhe kritikonte ashpër Ukrainën.

Wadephul vlerësoi qeverinë e re hungareze për nisjen e reformave të rëndësishme brenda një kohe të shkurtër.

“Rikthimi i shtetit të së drejtës dhe zbatimi i kërkesave evropiane janë lajme të mira”, deklaroi ai.

Gjatë qëndrimit në Budapest, Wadephul pritet të takohet me presidentin Andras Baka, ministren e Jashtme Anita Orban dhe ministrin e Ekonomisë Istvan Kapitany.

Ai është ministri i parë i Jashtëm gjerman që viziton Hungarinë prej gati shtatë vitesh dhe shoqërohet nga një delegacion biznesi.

Wadephul e cilësoi dëbimin e 10 diplomatëve rusë nga Hungaria javën e kaluar si një sinjal të qartë ndaj Moskës.

Ai tha se solidariteti i Budapestit pas një tentative sulmi me dron shpërthyes në aeroportin Lajpcig/Halle, në fillim të gushtit, të cilin Berlini ia ka atribuar Rusisë, si dhe sanksionet e BE-së të miratuara edhe nga Hungaria, i dërguan Moskës një mesazh të qartë:

“Ne po mbrojmë rendin e paqes në Evropë kundër agresionit të Rusisë“, shtoi Wadephul

Rusia mohon çdo përfshirje në incidentin me dronin në aeroportin e Lajpcigut.