Inter ka gati marrëveshjen me mbrojtësin francez, kushton 25 mln euro dhe kontratë deri vitin 2031

Pas fitimit të titullit kampion, tek Inter janë duke menduar që tani për merkaton e verës, ndërkohë që Marotta me shokë mbajnë një sy edhe nga Botërori që nis së shpejti, në zbulim të ndonjë talenti.

Klubi kërkon emra të rinj dhe vëmendja më e madhe është përqendruar te mbrojtja, ku lojtari i përzgjedhur është 26-vjeçari francez Oumar Solet, që luan në Serie A me skuadrën e Udinese.

Palët po mendojnë për një marrëveshje huazimi me bardhezinjtë, me një detyrim për ta blerë. Vlera fillestare është 25 milionë euro. Nga ana e lojtarit, gjithçka është tashmë e kopsitur, një marrëveshje është e vlefshme deri në vitin 2031.

Solet mund të luajë në të tre pozicionet në mbrojtjen e Chivu. Tek Udinese, ai luajti kryesisht si mbrojtës i djathtë, duke sulmuar vazhdimisht. Ai pati një sezon pozitiv: tre gola në 38 paraqitje këtë sezon.