Irani hedh poshtë akuzat se Huthi-t synuan Mekën: “çdo agresion ndaj vendeve të shenjta është i papranueshëm”

Zëdhënësi i Ministrisë së Jashtme të Iranit, Esmaeil Baghaei, deklaroi të enjten se çdo agresion ndaj vendeve të shenjta islame, përfshirë qytetet e Mekës dhe Medinës, dënohet dhe është i papranueshëm.

Deklarata e Baghaei-t, e bërë në X, vjen pasi Arabia Saudite tha se Huthi-t kishin lëshuar një dron drejt Mekës, i cili u interceptua. Sipas zëdhënësit iranian, “një pretendim i thjeshtë” për interceptimin e një droni “rrugës për në Mekë” nuk mjafton për t’i akuzuar Huthi-t se synuan qytetin e shenjtë.

“Republika Islamike e Iranit thekson domosdoshmërinë e parandalimit të politizimit të shenjtërive fetare, i cili i shërben vetëm interesave të regjimit sionist”, tha Baghaei.

Ai shtoi se rajoni ka parë raste të shumta “operacionesh false flag, veçanërisht nga regjimi sionist, të dizajnuara për të implikuar myslimanët dhe për të zhvendosur fajin te të tjerët”.

Mohimi iranian vjen pasi edhe lideri Huthi Abdul Malik al-Houthi e quajti pretendimin saudit një “gënjeshtër të shëmtuar”, duke thënë se grupi i tij nuk e ka synuar kurrë Mekën.

Burimi: Al Jazeera