ITALI – Meloni & Frederiksen: Mbështesim krijimin e qendrave të kthimit të migrantëve në vende të treta

– Kryeministrja italiane, Giorgia Meloni dhe homologia e saj daneze, Mette Frederiksen kanë përsëritur kundërshtimin e tyre ndaj emigracionit të pakontrolluar, duke kërkuar përshpejtimin e zbatimit të plotë të Paktit Evropian për Migracionin dhe Azilin.

Në një mesazh të përbashkët të publikuar në rrjetet sociale, dy kryeministret shprehen të bashkuara nga dëshira për të mbrojtur Evropën nga ndikimet negative të flukseve të pakontrolluara të emigracionit.

Meloni dhe Frederiksen vendosin në qendër të propozimit të tyre krijimin e qendrave të kthimit në vende të treta, një çështje për të cilën të dyja kanë ushtruar presion prej kohësh.

Nisma ka marrë edhe mbështetjen e Partisë Popullore Evropiane (PPE), ndërsa Manfred Weber ka kërkuar nga Brukseli një udhërrëfyes detyrues për realizimin e këtyre qendrave.

Sipas dy kryeministreve, çështja nuk lidhet vetëm me “sigurinë e qytetarëve”, por edhe me mbrojtjen e “trashëgimisë kulturore të krishterë”, për të cilën shprehen “krenare”.

Ato theksojnë se kjo trashëgimi duhet “mbrojtur” nga ata që mund të “përpiqen të na imponojnë modele jetese që nuk i ndajmë”.

Në mesazhin e tyre, Meloni dhe Frederiksen nënvizojnë gjithashtu se respektimi i ligjeve duhet të shkojë paralelisht me respektimin e vlerave evropiane, si për “emigrantët ilegalë”, ashtu edhe për “miliona qytetarë të huaj që jetojnë ligjërisht” në vendet e tyre dhe në Evropë.

Dy kryeministret përmendin ndër pasojat e flukseve të pakontrolluara “rritjen e niveleve të kriminalitetit”, “presionin në rritje mbi shërbimet publike” dhe “gërryerjen e besimit të qytetarëve”.

Ato theksojnë gjithashtu se është “e rëndë” kur emigrantë ilegalë, të cilëve u mungon e drejta për të qëndruar në territorin evropian, kryejnë krime të dhunshme, trafikojnë drogë ose janë përgjegjës për dhunë seksuale.

Çështja e migracionit pritet të rikthehet në tryezën e 27 vendeve anëtare në Këshillin e ardhshëm Evropian të tetorit.

Meloni dhe Frederiksen pritet të drejtojnë sërish takimin e grupit për emigracionin, i cili është zgjeruar gradualisht deri në 22 vendet nënshkruese të letrës drejtuar Brukselit pas zhvillimeve në Ceuta./ a.jor.