ITALI – Qeveria e Melonit bëhet më jetëgjata që pas Luftës së Dytë Botërore

ROMË, 4 shtator /ATSH-DPA/ – Kryeministrja italiane Giorgia Meloni ka vendosur një rekord historik me qeverinë e saj të krahut të djathtë, e cila që nga sot ka qenë në detyrë më gjatë pa ndërprerje se çdo qeveri tjetër që nga themelimi i Republikës Italiane në vitin 1946.

49-vjeçarja ka tejkaluar rekordin e mëparshëm të mbajtur nga qeveria e dytë e Silvio Berlusconit, e cila ishte në detyrë nga viti 2001 deri në vitin 2005.

Meloni, e cila gjithashtu drejton partinë e ekstremit të djathtë ”Vëllezërit e Italisë”, tani ka qenë kryeministre për 1 413 ditë.

Ajo u betua më 22 tetor 2022, si gruaja e parë që drejtoi një qeveri italiane.

Kabineti i dytë i Berlusconit zgjati 1 412 ditë.

Italia është karakterizuar nga ndryshime të shpeshta të qeverisë dhe paqëndrueshmëri politike gjatë dekadave të fundit.

Që nga themelimi i republikës 80 vjet më parë, vendi ka pasur 68 qeveri, të cilat zgjatën mesatarisht vetëm rreth 13 muaj.

Koalicioni i Melonit, i përbërë nga tre parti të krahut të djathtë dhe konservatore, ka qenë në pushtet për gati katër vjet.

Ky rekord vlen vetëm për mandatin e pandërprerë të një kabineti të vetëm.

Nëse llogariten së bashku disa qeveri të udhëhequra nga i njëjti kryeministër, Berlusconi mbetet përpara me më shumë se nëntë vjet në detyrë.

Meloni aktualisht renditet e shtata sipas kësaj mase.

Meloni e ka paraqitur jetëgjatësinë e qeverisë së saj si një sukses të madh.

Partia e saj po planifikon një tubim në qytetin portual jugor të Barit të premten në mbrëmje për të festuar këtë moment historik, ku edhe Meloni pritet të flasë.

Kritikët e akuzojnë atë se e ka kthyer jetëgjatësinë e qeverisë në një qëllim në vetvete dhe ankohen për ngërç politik./ a.jor.