J.Lo dhe Brett Goldstein reagojnë ndaj aludimeve për një romancë

Jennifer Lopez hodhi poshtë zërat se është në një lidhje romantike me kolegun e saj në filmin Office Romance, Brett Goldstein, gjatë një interviste në emisionin Today.

Gjatë bisedës, moderatorja Savannah Guthrie e pyeti drejtpërdrejt çiftin nëse spekulimet për kiminë e tyre jashtë ekranit janë të vërteta.

Lopez u përgjigj se njerëzit shpesh e lidhin romantikisht me kolegët e saj sa herë që punon ose shfaqet publikisht me ta.

“Sa herë që më shohin me dikë ose punoj me dikë, përpiqen të më lidhin me atë person,” tha ajo.

Goldstein iu bashkua me humor, duke thënë: “Mendoj se nëse qëndron pranë saj, kjo ndodh.”

Kur Guthrie vazhdoi të kërkonte një përgjigje më të qartë, Lopez këmbënguli se mohimi i saj ishte i qartë dhe kujtoi se më parë kishte pasur thashetheme të pabazuara edhe për një lidhje me Kevin Costner.

“Kjo ndodh gjatë gjithë kohës. Nuk do të thotë se është e vërtetë,” tha ajo.

Dyshja kanë nxitur spekulime gjatë promovimit të komedisë romantike Office Romance, e cila publikohet në Netflix këtë javë. Në film, Lopez interpreton një CEO që bie në dashuri me një punonjës të ri, rol i luajtur nga Goldstein.

Megjithatë, të dy aktorët theksuan se marrëdhënia e tyre është vetëm profesionale, pavarësisht kimisë që kanë shfaqur gjatë turneut promocional të filmit.