“Jam kushëriri i…”, si ra në kurth kambisti nga Durrësi. I morën 60 mijë euro

Një tjetër rast mashtrimi është zbuluar nga Policia, ky i dyshuar kryesor është një i ri nga Shkodra, i njohur për të tilla raste edhe më parë.

Gazetari i Klan News Besar Bajraktaraj, duke iu referuar burimeve policore raporton se i riu me inicialet F.Gj, i cili dyshohet se ndodhet në Gjermani ka arritur që të mashtrojë një kambist nga Durrësi.

Përmes mesazheve, F.Gj i është prezantuar kambistit si kushëriri i një biznesmeni të njohur. Kambisti kishte shoqëri me kushëririn e biznesmenit. 

Në këto mesazhe, ai i ka kërkuar 60 mijë euro, shumë që e ka orientuar që t’ja dorëzojë një personi tjetër pranë një qendre tregtare. Pasi personi i dërguar nga F.GJ ka marrë paratë, është larguar drejt Elbasanit. Aty ky i fundit është takuar me një tjetër person i cili ka mbërritur me taksi nga një fshat. Pasi ka marrë paratë është larguar sërish. Të dy këta persona nga Elbasani janë kapur nga policia dhe në dëshminë e tyre kanë thënë që i ka futur F.Gj.

Rasti është denoncuar nga vetë kambisti, i cili pasi dorëzoi 60 mijë eurot, kontaktoi me mikun e tij duke i thënë që e mbarova porosinë dhe aty ka kuptuar që i shoku i tij nuk i kishte kërkuar asgjë.

/tvklan.al