Janev në Prilep: ‘Miti i të paprekshmëve ra’, kallëzime penale për 21 persona pas operacionit të madh policor

Drejtori i Byrosë për Siguri Publike, Aleksandar Janev, vizitoi sot repartin e policisë së Prilepit, pas operacionit të madh policor të realizuar dy ditë më parë, ku u godit një grup i organizuar kriminal i përfshirë në trafikun e paligjshëm të drogës dhe në krim ekonomik — siç raporton portali Makfax.

Përpara gazetarëve, Janev deklaroi se “miti i të paprekshmëve më në fund ra”, duke falënderuar të gjithë pjesëmarrësit e aksionit nga policia e Prilepit dhe njësitet speciale. Sipas tij, pas hetimit të gjerë, Prokurorisë për ndjekjen e krimit të organizuar i është dërguar kallëzim penal ndaj 21 personave, katër prej të cilëve ishin punonjës të policisë së Prilepit. Gjatë kontrollit të një sefi bankar u sekuestruan mbi 50 mijë euro, ndërsa u sekuestruan edhe automjete.

Hetimi përfshiu kontrollin e 37 vendndodhjeve në Prilep, Shkup dhe Strugë. Janev njoftoi se hetimi vazhdon dhe prania e policisë në terren do të forcohet çdo ditë, duke u bërë thirrje qytetarëve të bashkëpunojnë aktivisht me institucionet dhe të denoncojnë krimin.

Aksioni i madh i 30 shtatorit nisi në orët e para të mëngjesit me pjesëmarrjen e njësive speciale dhe policëve me uniformë, në kuadër të një hetimi më të gjerë për dyshime për krim të organizuar në rajonin e Prilepit.