Ju erdhi fundi! Rama jep dorëheqjen!”/ Marshimi kilometrik mbërrin në qendër të Tiranës, protestuesit vijojnë revoltën

Qëndresa qytetare eshte  në ditën e 22-të, ndërsa mijëra protestues vijojnë marshimin në rrugët kryesore të Tiranës, duke e mbajtur të pandërprerë presionin ndaj qeverisë.

Pasi qëndruan për një kohë të gjatë përpara godinës së Kryeministrisë, protestuesit nisën një marshim kilometrik nëpër bulevardet dhe rrugët kryesore të kryeqytetit. Kolona e gjatë e qytetarëve ka mbërritur tashmë në qendër të Tiranës, ku atmosfera mbetet e ndezur dhe thirrjet kundër qeverisë dëgjohen pandërprerë.

“Ju erdhi fundi!” dhe “Rama jep dorëheqjen!” janë sloganet që dominojnë protestën, ndërsa pjesëmarrësit valëvisin flamuj kombëtarë dhe pankarta, duke kërkuar largimin e kryeministrit dhe ndryshim politik.

Për shkak të numrit të madh të protestuesve, qarkullimi i automjeteve në disa prej akseve kryesore të kryeqytetit është bllokuar përkohësisht, ndërsa marshimi vijon të lëvizë drejt zonave të tjera të qendrës.

Pavarësisht orëve të gjata në rrugë, pjesëmarrësit shprehen të vendosur ta vazhdojnë protestën, duke deklaruar se nuk do të tërhiqen deri në plotësimin e kërkesave të tyre. Revolta qytetare vijon kështu edhe në ditën e 22-të, me organizatorët që flasin për një nga mobilizimet më të mëdha të zhvilluara ndonjëherë në kryeqytet.