KARAKAS – Venezuela tërhiqet nga Gjykata Ndërkombëtare Penale

KARAKAS, 25 korrik /ATSH-DPA/ – Venezuela njoftoi zyrtarisht Organizatën e Kombeve të  Bashkuara se do të tërhiqet nga Gjykata Penale Ndërkombëtare (ICC).

Lajmi u bë i ditur nga ministri i Jashtëm, Felix Plasencia, i cili tha se vendimi është marrë me urdhër të presidentes në detyrë, Delcy Rodríguez.

Në një postim në rrjetin social X, Plasencia deklaroi se Venezuela i ka komunikuar OKB-së “vendimin e saj të prerë dhe të pakthyeshëm” për t’u larguar nga ICC-ja.

Sipas tij, autoritetet venezueliane besojnë se veprimtaria e Gjykatës pasqyron njëanshmëri gjeografike, duke u përqendruar në mënyrë disproporcionale te vendet afrikane dhe ato të Amerikës Latine, në dëm të vendeve të Jugut Global.

Ai shtoi se kjo qasje, sipas qeverisë së Karakasit, tregon një sistem të drejtësisë ndërkombëtare që nuk zbatohet në mënyrë të barabartë, por përdoret për të thelluar pabarazitë mes shteteve dhe për të cenuar të drejtën e tyre për vetëvendosje dhe sovranitet.

Vendimi vjen në një kohë kur Gjykata Penale Ndërkombëtare po heton qeverinë e ish-presidentit venezuelian Nicolás Maduro për akuza të dyshuara për krime kundër njerëzimit. Autoritetet venezueliane i kanë mohuar vazhdimisht këto akuza, duke i cilësuar ato si të motivuara politikisht./  /Ad.Ab./  a.jor.