Koalicioni ‘Serbia Evropiane – Marinika Tepiç – Zdravko Ponoš’ dorëzoi listën në RIK: mbi 10.200 firma për zgjedhjet e 25 tetorit

Përfaqësuesit e listës zgjedhore “Evropska Srbija – Marinika Tepić – Zdravko Ponoš” dorëzuan mbrëmjen e së shtunës (19 shtator) në Komisionin Republikan Zgjedhor (RIK) firmat e mbështetjes për zgjedhjet e parakohshme parlamentare të 25 tetorit. Janë mbledhur rreth 10.200 firma. Në RIK shkuan Petar Bošković dhe Slobodan Cvejić nga SRCE, si dhe Dušan Nikezić dhe Marinika Tepić nga Partia e Lirisë dhe Drejtësisë (SSP).

Zdravko Ponoš deklaroi se zgjedhjet e 25 tetorit pritet të kenë pjesëmarrje të madhe dhe theksoi se koalicioni i tyre është i vetmi grupim politik që mbron hapur anëtarësimin e Serbisë në Bashkimin Evropian. “Serbia ka humbur një çerek shekulli. Evropska Srbija është në zgjedhje, sepse Serbia nuk mund të presë më,” tha Ponoš.

Goran Ješić nga lëvizja Solidarnost tha se gara zgjedhore ka nisur dhe se koalicioni ka vetëm një kundërshtar. Ai u bëri thirrje mbështetësve të mos lejojnë “farën e së keqes” të mbillet mes tyre dhe Listës Studentore, duke theksuar se ata që fusin përçarje janë “antidemokratë të provuar”, kundër të cilëve kanë luftuar prej vitesh. “Synimi ynë është fitorja më 25 tetor,” u shpreh Ješić.

Kryetari i SSP-së, Dragan Đilas, foli për tërheqjet e fundit nga lista, duke thënë se bëhet fjalë për “luftëtarë të mëdhenj për ndryshim”, të cilët kanë dhënë sakrifica personale. Disa prej tyre, tha ai, janë lodhur nga politika dhe ai e kupton vendimin e tyre.

Kujtojmë se nga lista u tërhoqën zëvendëskryetari i SSP-së Borko Stefanović, kryetarja e degës së Nishit Jelena Milošević, kryetari i degës së Novi Sadit Vladimir Vrsajkov dhe nënkryetari Goran Petrović. Më herët ishin tërhequr ish-sekretari i përgjithshëm Peđa Mitrović dhe kryetarja e degës së Beogradit Mila Popović, ndërsa nga SRCE u larguan anëtarët e Kryesisë Slobodan Petrović dhe Boško Šindić, të cilët dolën në mbështetje të studentëve dhe njoftuan largimin nga partia.

Burimi: Danas