Koncerti i Kanye West, mijëra fansa e turistë nga vende të ndryshme po i drejtohen Eagle Stadium

Tirana do të presë sonte një nga emrat më të mëdhenj të muzikës hip-hop botërore, Kanye West. Reperi amerikan, i njohur edhe me emrin artistik Ye, do të mbajë koncertin në “Eagle Stadium”, një stadium i përkohshëm i ndërtuar posaçërisht për këtë aktivitet përgjatë aksit Tiranë–Durrës dhe që pritet të mbledhë dhjetëra mijëra fansa.

Ministri i Turizmit, Kulturës dhe Sportit, Blendi Gonxhja, ndau pamje nga atmosfera në kryeqytet e cila ka nisur të ndizet, ndërsa mijëra fansa dhe turistë nga vende të ndryshme të botës po i drejtohen Eagle Stadium për koncertin e shumëpritur.

Përmes një postimi në rrjetet sociale, Gonxhja shprehet se Tirana është gati të presë një nga netët më të mëdha muzikore, duke vënë në dukje entuziazmin dhe energjinë pozitive që kanë sjellë vizitorët.

“Të gjithë rrugët të çojnë te koncerti! Atmosfera ka nisur dhe fansa e turistë nga vende të ndryshme të botës po i drejtohen Eagle Stadium për një nga netët më të mëdha muzikore në Tiranë. Entuziazëm dhe shumë energji të mirë… Tirana është gati!”, shkruan Gonxhja.