Korça në korrik, muzikë, teatër e festivale përgjatë gjithë muajit

Kryebashkiaku i Korçës, Sotiraq Filo, përcolli në rrjetet sociale kalendarin e eventeve që do të zhvillohen në qytet përgjatë korrikut.

“Nga muzika dhe teatri, te festivalet dhe tradita, ky muaj sjell një kalendar të pasur aktivitetesh për banorët dhe vizitorët”, u shpreh Filo duke njohur publikun me programin dhe duke i ftuar ata të bëhen pjesë e atmosferës së verës në Korçë.

Aktivitetet kulturore nisin me Moto & Rock Festival i cili do të zhvillohet sot e nesër (3 dhe 4) në sheshin përpara Katedrales i cili do të shndërrohet në një skenë të madhe vere, ku muzika rock dhe pasioni për motorët bashkohen në një atmosferë unike.

Bashkia Korçë tha se, do të jenë dy ditë të mbushura me adrenalinë, ritëm dhe energji, që sjellin në Korçë motoristë dhe adhurues të rock-ut nga e gjithë Shqipëria.

Në datat 4, 5 dhe 6 korrik, artdashësit do të kenë mundësinë të ndjekin komedinë “8 persona plus”, në Teatrin “Andon Z. Çajupi”.

Mik Festival, i ideuar nga sopranoja Inva Mula, rikthehet në Korçë me edicionin e tij të 9-të, në datat 9, 10, 11 dhe 12 korrik. Ky edicioni i Mik Festival do të zhvillohet në Hanin e Pazarit, ne Teatrin “Andon Z. Çajupi”, në Polin e Jugut-Drenovë, në Hoçisht si dhe në Parkun Rinia.

Në datat 17 dhe 18 korrik do të zhvillohet Festivali Ndërkombëtar i Bandave “Lulu Fest”, në Zonën Këmbësore dhe në Pazarin e Vjetër.

Muaji korrik do të mbyllet plot shije me Festën e Lakrorit, në fshatin Polenë.