Kreu i OBSH: Epidemia e Ebolës në Kongo mori 220 jetë

Drejtori i përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, tha se në epideminë aktuale të Ebolës në Kongo, deri më tani janë regjistruar 220 vdekje, të cilat lidhen me sëmundjen.

“Ne po i rrisim urgjentisht operacionet, por për momentin epidemia është përtej fuqisë sonë,” tha Tedros, sipas Reuters.

Ai deklaroi se do të udhëtojë për në Kongo nesër dhe se përballimi i epidemisë që po përhapet me shpejtësi është i ndërlikuar nga fakti se provincat e Iturit dhe Kivusë Veriore në atë vend janë shumë të pasigurta dhe se nuk ka vaksina të miratuara për virusin Bundibugyo, i cili shkakton atë lloj Ebole.

Tedros theksoi se vendet që kufizohen me Kongon, ku epidemia është në qendër të saj, duhet të marrin masa urgjente.

Më herët gjatë ditës së sotme, Uganda fqinje raportoi dy raste të tjera të Ebolës në atë vend, duke e çuar numrin e përgjithshëm të rasteve të konfirmuara në shtatë.

Organizata Botërore e Shëndetësisë ka shpallur gjendje të jashtëzakonshme për shkak të shpërthimit të llojit të rrallë të Ebolës, Bundibugyo.