Kryeprokurori i Shtetit konfirmon mbështetjen institucionale për Shoqatën e Prokurorëve të Kosovës

Kryeprokurori i Shtetit, Zejnulla Gashi, zhvilloi takim me kryetarin e Shoqatës së Prokurorëve të Kosovës, prokurorin z. Naim Abazi, dhe me anëtarët e kryesisë së kësaj shoqate.

Sipas një njoftimi për media thuhet se në takim u diskutuan çështje me rëndësi për punën, aktivitetet dhe funksionimin e Shoqatës së Prokurorëve të Kosovës; u trajtuan nevojat dhe sfidat me të cilat përballet kjo shoqatë dhe prokurorët e shtetit gjatë ushtrimit të detyrave të tyre kushtetuese dhe ligjore.

Në këtë drejtim, Kryeprokurori i Shtetit konfirmoi mbështetjen e tij të plotë institucionale për Shoqatën e Prokurorëve të Kosovës dhe shprehu gatishmërinë për bashkëpunim të ngushtë në mbështetje të iniciativave dhe në adresimin e kërkesave të tyre legjitime, me qëllim fuqizimin e pozitës dhe rolit të prokurorëve të shtetit, mbrojtjen e integritetit dhe pavarësisë. /Telegrafi/