Kuvendi në seancë plenare, PD bojkoton punimet: Të plotësohen kërkesat e protestuesve

Kuvendi i Shqipërisë mblidhet këtë të hënë, më 13 korrik, në orën 10:00, në seancë plenare, ku deputetët do të shqyrtojnë një sërë projektrezolutash që lidhen me vlerësimin e veprimtarisë së institucioneve kryesore të vendit për vitin 2025.

Ashtu si seancën e shkuar Partia Demokratike ka vendosur të mos marrë pjesë as në seancën plenare të nesërme të Kuvendit. Vendimi u është komunikuar deputetëve të grupit parlamentar përmes një njoftimi të brendshëm.

“Të nderuar kolegë! Ju njoftoj se nesër nuk do të marrim pjesë në seancën plenare, sipas vendimit të Grupit Parlamentar dhe qëndrimit të bërë tashmë publik”, thuhet në njoftimin drejtuar deputetëve të PD-së.

Kjo do të jetë seanca e dytë radhazi që demokratët bojkotojnë, pas asaj të javës së kaluar, ku gjithashtu nuk morën pjesë për shkak të qëndrimit të tyre se kërkesat e protestuesve nuk ishin marrë parasysh.

Qëndrimi i bërë publik nga Partia Demokratike është se kërkesat e protestuesve duhet të pranohen. Protestuesit vijojnë prej 43 ditësh tubimet në bulevard kundër qeverisë, por qëndrimet e tyre kanë përfshirë kritika edhe ndaj opozitës, duke kundërshtuar jo vetëm mazhorancën, por edhe mënyrën e përfaqësimit politik nga partitë opozitare.