Leigh-Anne Pinnock bëhet nënë për herë të tretë: vjen në jetë djali i saj me Andre Gray
Këngëtarja e Little Mix njoftoi të mërkurën lindjen e fëmijës së saj të tretë me bashkëshortin Andre Gray: "Djali ynë i bukur është këtu".
Leigh-Anne Pinnock është bërë nënë për herë të tretë. Këngëtarja 35-vjeçare e grupit Little Mix dhe bashkëshorti i saj, Andre Gray, mirëpritën në jetë një djalë, fëmijën e tyre të tretë së bashku, siç njofton Just Jared. Lajmin e bukur e dha vetë këngëtarja të mërkurën, më 18 nëntor, përmes një postimi në Instagram, ku ndau një fotografi të të porsalindurit dhe shkroi: “Our beautiful baby boy is here”.

Djali i vogël vjen në një familje që tashmë është e plotë me dy motra të mëdha. Pinnock dhe Gray janë prindër të dy vajzave binjake, të cilat i mirëpritën në gusht të vitit 2021, dy vjet përpara se të martoheshin. Binjaket mbushën pesë vjeç këtë verë, duke e bërë ardhjen e vëllait të tyre të vogël një gëzim të dyfishtë për familjen.
Shtatzëninë, këngëtarja e kishte zbuluar për herë të parë në korrik, me një video të xhiruar në studion e regjistrimit. Në mbishkrimin e videos ajo shkruante: “As one chapter ends, another begins”, ndërsa në sfond dëgjohej kënga e saj “Heaven”, kënga e fundit e albumit të saj të parë solo, “My Ego Told Me To”. Në fund të këngës dëgjohen edhe zërat e vajzave të saj, një detaj i ëmbël që e bëri njoftimin edhe më personal.
Edhe pse e ndan shpesh jetën e saj me ndjekësit, Pinnock ka zgjedhur ta mbajë private një pjesë të rëndësishme të familjes. Më herët këtë vit, ajo i tregoi revistës People arsyen pse ajo dhe Andre nuk i zbulojnë emrat dhe fytyrat e binjakeve: ajo dëshiron që vajzat e saj të kenë mundësinë të vendosin vetë nëse duan të rriten në sy të publikut. “I want them to be able to make that decision”, tha ajo, duke theksuar se vendimi për jetën publike duhet t’u përkasë atyre.
Me lindjen e djalit, familja e Pinnock dhe Gray hyn në një kapitull të ri, të cilin këngëtarja e kishte paralajmëruar që në verë. Ndërsa detaje të tjera për të porsalindurin pritet të zbulohen në ditët në vijim, postimi i saj i të mërkurës mjaftoi për të mbushur me urime rrjetet sociale dhe për të shënuar një tjetër moment të lumtur për ish-anëtaren e Little Mix.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.