Lojërat Mesdhetare: Mundja, shans për medalje në “Taranto 2026”

Ardit Zeneli është i pari që i jep Shqipërisë shansin për medalje në Lojërat Mesdhetare “Taranto 2026”. Pikërisht në mundje, në peshën deri në 67 kilogram, Zeneli të dielën do të jetë në garë për medaljen e bronztë, teksa do të jetë përballë grekut Ntunias.

Më parë në 1/8 e finaleve, Zeneli mundi italianin Sandroni, 11-3, kurse në gjysmëfinale u mund nga algjeriani Benfredj, 3-5. Po në mundje, Bajram Sina në peshën deri në 60 kilogram, në stilin greko-roman, u mund në 1/8 e finaleve nga italiani Pusher, 0-9 me superioritet pikësh. R të njëjtin fat pati dhe Kevin Kupi në peshën deri në 77 kilogram, kjo në 1/8 e finaleve, teksa u mund 0-5 nga turku Basar. E meqënëse Basar është finalen e kësaj peshe, atëherë Kevin Kupi ka dhe një shans tjetër në ripeshkim për medaljen e bronztë, teksa do të vihet përballë algjeriani Dushe.

Ndërkohë në not, Arla Dermishi në 50 metra delfin ishte e shtata në baterinë e tretë kualifikuese me kohën 28”49, kurse Luna Djarmati nuk mori pjesë në 200 metra shpinë. Në taekuondo, Ernest Merdanaj fitoi ndeshjen e parë me libanezin Zarifeh dhe mund në 1/16 e finaleve nga turku Berkaj.

Në boks, kuqezinjtë ngjiten të dielën me Amar Koçin, i cili në peshën deri në 80 kilogram, kjo në raundin e 1/16 të finaleve, do të ndeshet me Tsamalidis. Të martën do të jetë radha e Ariol Zenelit, që do të jetë në raundin çerekfinal të peshës deri në 60 kilogram.

Në çiklizëm gara e kronometrit individual nuk ka shkuar mirë, teksa për femra Nelia Kabetaj dhe Nikol Dollaku nuk e kanë nisur garën, kurse për meshkuj Lukas Sulaj Kloppenborg ishte i nëntëmbëdhjeti dhe Leo Piku ishte i 21-ti.

Tanimë të gjitha forcat janë për garën e rrugës, që do të zhvillohet të martën, ndërsa në Lojërat Mesdhetare “Taranto 2026” janë shpërndarë dhe medaljet e para.