Lufta shtrenjton jetën në Jemen: Huthi-t rrisin çmimin e benzinës me 10% — hera e parë në katër vjet

Familjet në Sanaa po përgatiten për çmime më të larta të ushqimit dhe transportit, pas rritjes së parë të çmimit të karburantit në katër vjet. Të hënën, Huthi-t njoftuan një rritje prej rreth 10 për qind të çmimit të benzinës — nga 4,750 në 5,250 rijalë jemenas (nga rreth 8.90 në 9.80 dollarë) për një rezervuar, në zonat e kontrolluara prej tyre, raporton Al Jazeera.

Ahmed Yahya, 28 vjeç, shofer taksie në Sanaa, thotë se deri në fillim të javës paguante 4,750 rijalë për të mbushur rezervuarin. “Kur dëgjova njoftimin për çmimin e ri të karburantit, u trondita dhe u zhgënjeva. Mezi po mbijetojmë, dhe kjo rritje do ta bëjë mbijetesën edhe më të vështirë”, tha ai, duke e përshkruar rritjen si një tjetër “surprizë të dhimbshme për një popull tashmë të shkatërruar” pas vitesh mjerimi ekonomik.

Marrja e bregdetit jugor të Detit të Kuq të Jemenit nga Huthi-t javën e kaluar, si dhe sulmet ndaj Arabisë Saudite, kanë luajtur një rol të madh në rritjen e çmimeve, sipas Al Jazeera-s.

Rritja godet një vend ku 18 milionë njerëz përballen tashmë me mungesa akute ushqimore, dhe pritet të shtrenjtojë zinxhirin e furnizimit me ushqime dhe transportin publik në një nga krizat më të rënda humanitare në botë.

Burimi: Al Jazeera — aljazeera.com