Lukashenko fal 28 të burgosur politikë në një përpjekje për të përmirësuar marrëdhëniet me Perëndimin

Presidenti autoritar bjellorus Alexander Lukashenko shpalli të mërkurën faljen e 28 personave të dënuar për arsye politike. Me një dekret të botuar për Ditën e Pavarësisë ai liroi persona që autoritetet i kishin dënuar për “krime ekstremiste” dhe argumentoi se vendimi ishte marrë për arsye humanitare.

Lukashenko, i cili udhëheq vendin prej më shumë se tri dekadash dhe ka qenë nën sanksione perëndimore për shkelje të të drejtave të njeriut dhe për lehtësimin e përdorimit të territorit bjellorus nga Rusia gjatë pushtimit të Ukrainës, ka përjetuar sfida të mëdha pas protestave masive të vitit 2020 dhe një shtypjeje të ashpër kundër opozitës, raporton Associated Press.

Gjatë vitit të fundit ai ka liruar grupe të mëdha të burgosurve politikë përmes marrëveshjeve me ndërmjetësim ndërkombëtar. Në mars u liruan 250 të burgosur politikë si pjesë e një marrëveshjeje të ndihmuar nga SHBA, ndërsa Uashingtoni hoqi disa sanksione ndaj dy bankave shtetërore, Ministrisë së Financave dhe disa prodhuesve kryesorë të potashit. Në prill u bë edhe një shkëmbim që çoi në lirimin e gazetarit Andrzej Poczobut dhe në gjithsej dhjetë persona të liruar.

Organizata e të drejtave të njeriut Viasna vlerëson se në Bjellorusi vazhdojnë të jenë rreth 864 të burgosur politikë, përfshirë 21 gazetarë. Raporti i ekspertit të posaçëm të OKB-së për Bjellorusinë, Nils Muižnieks, paralajmëron se pavarësisht lirimeve të fundit nuk ka një përmirësim të përgjithshëm të situatës së të drejtave të njeriut. “Përparimi i qëndrueshëm kërkon një fund të shtypjes së motivuar politikisht dhe përgjegjësi për shkeljet e kaluara,” tha ai. Udhëheqësja e opozitës në mërgim, Sviatlana Tsikhanouskaya, vlerësoi se lirimi i 28 personave do të sjellë lehtësim për familjet e tyre, por nënvizoi se qindra të tjerë ende mbeten në burgje dhe duhen liruar.

Shumë analistë interpretojnë amnistinë si një hap të synuar për të zbutur tensionet me Perëndimin, por kërcënimet për të drejtat e njeriut vazhdojnë të jenë një pengesë kryesore për normalizimin e marrëdhënieve, sipas Associated Press.