Maqedonia po bëhet “El Dorado” e gjuetarëve të huaj: fotografohen me drerë të vrarë, kërkohet hetim urgjent

Pas publikimit të videove të gjuetarëve spanjollë që vrisnin dhi të egra në Parkun Kombëtar "Mavrovë", një valë e re postimesh në rrjetet sociale po e vë sërish në qendër të debatit gjuetinë e huaj në Maqedoni. Gjuetarë nga vende të ndryshme ballkanike po publikojnë fotografi ku shihen pranë ekzemplarëve të gjuetisë së madhe dhe kapital të vrarë në territorin maqedonas.

Në një nga postimet në Facebook, një gjuetar pozon pranë një dreri të vrarë, duke shkruar: "Gjueti drerësh në Maqedoni. Mbreti im i parë i pyllit. Një moment që mbahet mend gjithë jetën". Postimi ka ndezur reagime të shumta dhe e ka rihapur pyetjen: sa po shndërrohet Maqedonia në një lloj "El Dorado" të gjuetisë për gjuetarët e huaj, dhe në çfarë kushtesh lejohet realisht vrasja e gjahut kapital?

Rasti vjen menjëherë pas skandalit me videot e gjuetarëve spanjollë në "Mavrovë", ku përveç vrasjes së dhive të egra, shihej edhe pirja e gjakut nga kafsha e vrarë. Drejtoria e Parkut Kombëtar kishte pretenduar atëherë se bëhej fjalë për "vrasje sanitare" në kuadër të programit të mbarështimit të gjahut – një version që u vu në dyshim nga opinioni publik dhe nga organizatat mjedisore.

Fotografitë dhe videot gjithnjë e më të shpeshta, që vetë gjuetarët e huaj i publikojnë në rrjetet sociale, e bëjnë të domosdoshme që institucionet kompetente të bëjnë të qartë: ku, në çfarë numri dhe mbi bazën e çfarë lejesh kryhet vrasja e gjahut të madh dhe kapital në Maqedoni.

Shoqata për mbrojtjen e kafshëve "Anima Mundi" e dënoi ashpër rastin e fundit dhe kërkoi veprim të menjëhershëm institucional, hetim të plotë dhe përcaktim të përgjegjësisë. "Maqedonia nuk është park gjuetie për të huaj të pasur", u shpreh shoqata, duke kërkuar transparencë të plotë mbi lejet e dhëna për gjueti.

Burimi: 48chasa.mk