Mediat shpërthejnë kundër Ronaldo pas barazimit dhe sulmojnë trajnerin Martinez: Ka frikë ta ulë në stol

Performanca e dobët që solli barazimin e Portugalisë kundër Kongo në debutimin e tyre në Kupën e Botës 2026, ka sjellë pakënaqësi te portugezët. Nën kritika ka përfunduar e gjithë skuadra, veçanërisht Cristiano Ronaldo.

Në moshën 41 vjeç, sulmuesi i Al Nassr ka pretendime të mëdha për Kupën e tij të gjashtë të Botës, por fusha dha një vendim tjetër. Madje edhe kundërshtarët e tij të Republikës Demokratike të Kongos, e thanë troç.

“Ai nuk është më i njëjti. Nuk kishim përgatitur një kafaz, një plan specifik për Cristiano Ronaldon. Ai nuk është i njëjti si më parë, është pak më i vjetër tani. Kur arrin një moshë të caktuar, nuk mund të bësh të njëjtat gjëra si më parë“, tha Mukau, mesfushori i Lille, pas barazimit 1-1.

Edhe trajneri Roberto Martinez është gjithashtu i shënjestruar nga mediat. Këto fjalë nuk do ta kënaqin CR7, dhe ndoshta as Roberto Martinez, i cili tani ka shqetësime të tjera përpara ndeshjes të së martës kundër Uzbekistanit, një ndeshje që duhet fituar patjetër për të arritur në raundin tjetër.

Trajneri portugez është kritikuar gjithashtu për vonesën e futjes së Gonçalo Ramos, pikërisht në vend të fituesit pesë herë të Topit të Artë: “A po shohim të njëjtën ndeshje? Ai kishte frikë ta nxirrte Ronaldo nga fusha, nuk është kështu si stërvitet“, është një nga mendimet më të përsëritura në Portugali.

Ende duket e vështirë të imagjinohet kapiteni duke e filluar ndeshjen nga stoli, por edhe nëse do të shihnim një imitim të zbehtë të Cristiano Ronaldo kundër Uzbekistanit, rruga e tij në këtë Kupë Bote do të ishte një betejë e vështirë, për të mos thënë më shumë.