Milani përgatit “revolucionin”, Leao “sjell” Zirkzee. Çfarë dysheje me Sorloth për Allegrin

Për ta perifrazuar një këngë të vjetër, mund të këndohej “Furlani, më ndrysho pamjen”. Dhe pikërisht për këtë bëhet fjalë, sepse në shtëpinë e Milanit një gjë është e sigurt; vera do të jetë e revolucionit. Një revolucion që do të përfshijë gjithë repartin ofensiv të Allegrit, i “rrëzuar” në bllok në fund të një sezoni ku sulmuesit e “Djallit” zhgënjyen jo pak. Duke nisur nga kush mbetet.

Për momentin, pavarësisht frenimit në rinovim, i vetmi që mund të veshë ende fanellën kuqezi sezonin e ardhshëm është Christian Pulisic. Amerikani, pas një nisjeje entuziazmuese, u zbeh me kalimin e kohës, por mbetet një kartë ku Allegri beson. Të tjerët? Të gjithë në merkato; nga Rafa Leao te Fullkrug (që nuk do të blihet), deri te Nkunku dhe Gimenez. Si në një film të vjetër, “do të mbetet vetëm një”.

Për katër që largohen, është e qartë se duhet të vijnë të tjerë. Dy emrat më të përfolur janë Sorloth dhe Joshua Zirkzee. Norvegjezi, një “9” klasik, është i bllokuar te Atletico Madridi dhe kërkon ndryshim. Klubi spanjoll nuk do ta pengojë dhe Milani ofron rreth 20 milionë euro, me synimin për të mos kaluar 30.

Ndërkohë, Zirkzee lidhet me një plan më të gjerë që përfshin edhe Leao, i pëlqyer nga Manchester United. Milani kërkon 50 milionë “cash”, ndërsa anglezët mendojnë ta përfshijnë ish-lojtarin e Bologna si kundërvlerë. Një dyshe e mundshme me Sorloth mbetet ide shumë intriguese.