“Mokra n’Fest” më 8 gusht, magjia e një tradite që ruhet me krenari brez pas brezi

Mokra do të presë më 8 gusht edicionin e shtatë të festivalit “Mokra n’Fest”, një ftesë e hapur për të përjetuar nga afër magjinë e një tradite që ruhet me krenari brez pas brezi.

Kjo festë që prej vitesh mbledh bashkë mokrarët nga e gjithë Shqipëria dhe më gjerë, duke kthyer këtë zonë të bukur malore në një qendër të traditës, kulturës dhe mikpritjes.

Zëvendëskryeministrja Albana Koçiu tha sot se kjo festë është një rrugëtim në zemër të trashëgimisë sonë kulturore, aty ku mikpritja shqiptare shfaq fytyrën e saj më të bukur, peizazhet ndërthuren me historinë dhe vallja bëhet gjuha e përbashkët e gëzimit.

“Më 8 gusht, pranë Urës së Gurit në Golik, festojmë së bashku vlerat që na përfaqësojnë më së miri: traditën, kulturën dhe krenarinë për Shqipërinë”, tha Koçiu.

Gjatë festës vizitorët do të kenë mundësinë të shijojnë gatimet karakteristike të zonës, përgatitur nga duart e nënave mokrare.

Ndër aktivitetet që pritet të mbahen janë edhe kanoe në lumin Shkumbin, kamping në natyrë, koloni piktorësh, ekspozitë fotografike, argëtim për fëmijë dhe të rinj.

Ky festival folklorik është një kthim në rrënjë, një kujtesë e vlerave dhe identitetit kulturor, si dhe një ftesë për të jetuar nga afër shpirtin mokrar.