Moratti dhe hetimi për arbitrat: Budallallëk krahasuar me Calciopoli, Interi s’është ndihmuar kurrë

“Duket si një luftë e vogël mes arbitrave të ndryshëm, nuk shoh krahasime me Calciopoli. Krahasuar me atë, kjo e tanishmja është një budallallëk”. Ky është mendimi i Massimo Morattit, i cili, si gjithë sportistët italianë, po ndjek nga afër “tërmetin” që ka goditur arbitrat italianë dhe ka çuar në vetëpezullimin e dizenjatorit Gianluca Rocchi, pas akuzës për bashkëpunim në mashtrim sportiv.

“Besoj se çështja ka të bëjë me arbitrat dhe jo me klubet, – vazhdoi ish-presidenti i Interit. – Nëse klubet kanë folur ndonjëherë me arbitrat për të sugjeruar një profil të preferuar? Ky koncept nuk më përkiste mua. Kisha edhe frikë, edhe respekt, sepse mund të vendosnin fatin e ekipit tim, sidomos duke pasur Juventusin përballë. E imagjinoja si gjë të vështirë dhe nuk flisja me ta”.

Më pas, Moratti u shpreh për shortin e arbitrave: “E konsideroj një zgjidhje të dëshirueshme. Çdo zgjidhje që i mban klubet jashtë është e mirëpritur. Nuk shoh manipulime; duke parë ndeshjet nuk më duket diçka e pabalancuar. Interi nuk ka marrë ndihma as kur ka fituar, as kur ka humbur. Ka gabime arbitrale të rënda, por ndodhin gjithmonë”.