Mourinho zgjedh një italian për mbrojtjen e Real Madridit, por që nuk luan në Serie A

Jose Mourinho pritet të ndryshojë komplet mbrojtjen aktuale te Real Madrid. “Los Blancos” mund të thuhet që kanë siguruar dy përforcimet e para në këtë repart për sezonin e ri.

I pari është Ibrahima Konate, i cili do të vijë falas. I dyti është Denzel Dumfries, për krahun e djathtë, për të cilin madrilenët do të paguajnë klauzolën e tij 25 milionë euro, brenda 15 korrikut.

Mourinho nuk mjaftohet me kaq dhe ka piketuar një tjetër përforcim për mbrojtjen. Bëhet fjalë për finalistin e Champions League, Riccardo Calafiori, i cili mund të luajë si mbrojtës i majtë, por edhe në qendër të mbrojtjes.

Calafiori është nën kontratë me londinezët deri në vitin 2029 dhe vlera e tij në treg nëse i referohemi Transfermarkt është 55 milionë euro. Por, sipas rpaortimeve të ndryshme, Arsenal do të hiqte dorë nga Calafiori, vetëm për një ofertë mbi 60 milionë euro.