Ndahet nga jeta Prof. Dr. Qirjako Meniko, Gonxhja: I kushtoi jetën formimit të brezave të tërë artistësh

Është ndarë nga jeta Prof. Dr. Qirjako Meniko, një nga figurat më të shquara të artit shqiptar, studiues, pedagog dhe piktor, i cili për dekada dha një kontribut të rëndësishëm në arsimin artistik dhe historinë e arteve figurative në Shqipëri.

Ministri i Turizmit, Kulturës dhe Sportit, Blendi Gonxhja, përmes një mesazhi ngushëllimi në rrjetet sociale, theksoi se ndarja e prof. Menikos nga jeta është një humbje të madhe për kulturën shqiptare.

“Për më shumë se katër dekada, Prof. Meniko i kushtoi jetën formimit të brezave të tërë artistësh, studiuesish dhe skenografësh, duke dhënë një kontribut të jashtëzakonshëm si pedagog në Institutin e Lartë të Arteve dhe më pas në Universitetin e Arteve. Si autor i teksteve themelore të historisë së arteve figurative dhe si studiues i palodhur, ai ndihmoi në ndërtimin e bazave akademike të edukimit artistik në vend”, shkruan ai.

Sipas ministrit, kontributi i tij u shtri edhe në drejtimin e Galerisë Kombëtare të Arteve, në kritikën artistike dhe në krijimtarinë e tij si piktor, me vepra të ekspozuara brenda dhe jashtë Shqipërisë, duke lënë pas një trashëgimi të çmuar për kulturën shqiptare.

Gonxhja theksoi se Ministria e Turizmit, Kulturës dhe Sportit shpreh ngushëllimet më të sinqerta familjes, të afërmve, Universitetit të Arteve, komunitetit akademik dhe gjithë botës së artit për këtë humbje të madhe.