“Nga 2.2 në 13.7 milionë pasagjerë”, Rama: Rinasi drejt një epoke të re dixhitale

Kryeministri Edi Rama vlerësoi zhvillimin e Aeroportit Ndërkombëtar “Nënë Tereza” si një nga historitë më të suksesshme të transformimit të infrastrukturës në vend.

Gjatë ceremonisë së inaugurimit të fluturimit të parë Tiranë–Toronto, ai theksoi rritjen e ndjeshme të numrit të pasagjerëve dhe fluturimeve gjatë dekadës së fundit, duke e renditur aeroportin e Tiranës në krye të Europës për ritmin e zgjerimit.

“Aeroporti i Tiranës mban vendin e parë në Europë për rritjen e numrit të pasagjerëve. Nga 2016 në vitin 2025, rritja ka qenë marramendëse. Në vitin 2016 kishte 22 mijë fluturime në vit për 2.2 milionë pasagjerë. Më pak se 10 vjet më vonë, numri i pasagjerëve arriti në 13.7 milionë dhe numri i fluturimeve në 82 mijë. Ne mendojmë që do të kalojë 100.000 në fund të kësaj dekade. Rinasi është ndër të parët që ka hedhur hapin e kalimit të dixhitalizuar të Check-in”, tha kryeministri.

Rama nënvizoi gjithashtu se aeroporti po hyn në një fazë të re modernizimi, me investime në teknologji dhe dixhitalizim, që synojnë ta bëjnë përvojën e udhëtimit më të shpejtë dhe më efikase për qytetarët shqiptarë.

“Së shpejti, do të hapim këtu një kapitull të ri të transformimit dixhital të aeroportit dhe modernizimit të tij, portat dixhitale, të cilat do të jenë porta ku do të hyhet pa asnjë lloj kontrolli nëse je shqiptar dhe ke një pasaportë biometrike. Kjo do të bëjë që për të gjithë pasagjerët shqiptarë që hyjnë në Rinas të hyjnë si në shtëpinë e tyre dhe i gjithë info do të merret përmes inteligjencës artificiale që do të ketë kjo portë. Do të jetë një transformim i jashtëzakonshëm në shumë aspekte” theksoi Edi Rama.