“Nga Alpet zvicerane në Adriatikun shqiptar”, koncerti me muzikë dhome në Muzeun Arkeologjik të Durrësit

Publiku i pranishëm në mjediset e Muzeut Arkeologjik Kombëtar të Durrësit përjetoi emocione të veçanta përmes një programi që bashkoi mjeshtërisht kryeveprat e Beethoven-it dhe Othmar Schoeck me perlat e muzikës shqiptare, duke krijuar një urë artistike “Nga Alpet zvicerane në Adriatikun shqiptar”.

Mbrëmja ishte pjesë e performancave të Festivalit XXI Ndërkombëtar të Muzikës së Dhomës, “Chamber Fest Durrës”, me interpretimin e shkëlqyer të Kuartetit të Harqeve zviceran.

Duartrokitjet e gjata dëshmuan edhe një herë se muzika e dhomës flet një gjuhë universale, duke bashkuar artistë dhe publik përtej kufijve.

“Chamber Fest Durrës” do të vijojë koncertet e tij në Muzeun Arkeologjik, për të ndarë emocionet e muzikës së dhomës me publikun artdashës.

Edicioni i 21-të do të vazhdojë deri më 12 korrik, me artistë të shquar nga Shqipëria dhe bota, duke e kthyer qytetin në një qendër të rëndësishme të dialogut kulturor dhe artistik.