Nga “Spider-Man” te “The Odyssey”: Lëvizja e papritur e aktorit Tom Holland

Një vendim i pazakontë në Hollywood ka sjellë në qendër të vëmendjes aktorin e mirënjohur Tom Holland, i cili ka zbuluar se ka zhvilluar një “bisedë të sikletshme” me drejtuesit e Sony Pictures për të shtyrë xhirimet e filmit “Spider-Man: Brand New Day”, në mënyrë që të mund të merrte pjesë në projektin e ri kinematografik “The Odyssey”.

Në një intervistë për revistën GQ, aktori tregoi se gjatë verës së kaluar kishte diskutuar personalisht me kreun e Sony, Tom Rothman, për ndryshimin e orarit të produksionit dhe në fund kishte arritur ta bindte studion falë reputacionit të mirë të regjisorit të “The Odyssey”.

“Një nga arsyet pse Sony pranoi shtyrjen është reputacioni i Christopher Nolan, i cili nuk i tejkalon afatet e xhirimeve dhe nuk i mban aktorët larg për vite të tëra”, u shpreh Holland.

Sipas tij, çdo regjisor tjetër mund ta kishte bërë negociatën shumë më të vështirë, por besimi te Nolan bëri diferencën. Holland shtoi se xhirimet e “The Odyssey” përfunduan madje nëntë ditë më herët se plani, ndërsa më pas ai iu rikthye menjëherë projektit të Spider-Man.

Aktori tha gjithashtu se shtyrja e filmit të Marvel Studios dhe Sony Pictures mund ta ketë përmirësuar rezultatin final, pasi i dha kohë regjisorit Destin Daniel Cretton t’i bashkohej projektit.

“Besoj sinqerisht se kemi realizuar versionin më të mirë të mundshëm të një filmi Spider-Man”, u shpreh ai.

Duke folur për bashkëpunimin me Nolan, Holland theksoi se përvoja ishte krejt ndryshe nga projektet e tij të mëparshme, duke vlerësuar nivelin e jashtëzakonshëm të përgatitjes së regjisorit.

Më herët, ai rrëfeu gjithashtu se kishte bërë një pauzë disa vjeçare nga aktrimi, pasi ndihej i mbingarkuar dhe donte të fokusohej në jetën personale.

“Doja të sigurohesha që ende e dua atë që bëj”, tha ai.

Në intervistë u përmend edhe partnerja e tij, Zendaya, e cila luan gjithashtu në të dy projektet, ndonëse çifti nuk ndan skena së bashku në “The Odyssey”. Holland madje tregoi se kishte vizituar setin e saj në ditën e parë të xhirimeve.

Ndërkohë, kolegët e tij në film, Robert Pattinson dhe Matt Damon, kanë përshkruar xhirimet e “The Odyssey” si jashtëzakonisht të vështira, të realizuara në gjashtë vende të ndryshme dhe në kushte shpesh ekstreme.

Filmi “The Odyssey” pritet të dalë në kinema më 17 korrik, ndërsa “Spider-Man: Brand New Day” më 31 korrik.