Nisin punimet në rrugën Krushë e Madhe–Rahovec, investim 153 mijë euro kundër rrëshqitjes së dheut

Ministria e Infrastrukturës dhe Transportit ka nisur punimet për rehabilitimin e rrugës rajonale R204, në segmentin Krushë e Madhe–Rahovec, siç njofton RTK. Ndërhyrja përqendrohet te ura që ndodhet në fshatin Brestovc të Rahovecit, ku do të stabilizohet rrëshqitja e dheut dhe do të ndërtohet muri mbrojtës.

Sipas njoftimit të ministrisë, të cilin e përcjell edhe Telegrafi, vlera e investimit në këtë projekt është 153 mijë euro, ndërsa afati i paraparë për përfundimin e punimeve është 60 ditë kalendarike.

Projekti parasheh eliminimin e rrezikut nga rrëshqitja e dheut, e cila rrezikonte qarkullimin në këtë segment, si dhe ndërtimin e trotuarit për këmbësorë në urë, me qëllim rritjen e sigurisë për të gjithë pjesëmarrësit në trafik.

Realizimi i projektit pritet të përmirësojë kushtet e qarkullimit dhe të lehtësojë lëvizjen e banorëve të zonës, por edhe të të gjithë qytetarëve që shfrytëzojnë segmentin rrugor R204, Krushë e Madhe–Rahovec.