Nuk mjafton lufta në Iran: “Super El Niño” mund të shkaktojë rritje të çmimeve të ushqimeve deri në vitin 2028

Një fenomen i fuqishëm El Niño mund të shkaktojë një valë të re të rritjes së çmimeve të ushqimeve në nivel global, me pasojat që mund të zgjasin deri në gjysmën e dytë të vitit 2028, paralajmërojnë ekonomistët.

Sipas ekspertëve, bota po përballet me “dy goditje njëkohësisht”: ndikimin e luftës me Iranin, e cila ka rritur çmimet e produkteve ushqimore në nivelin më të lartë të tre viteve të fundit, dhe efektet e motit ekstrem të lidhura me fenomenin El Niño.

Shkencëtarët vlerësojnë se cikli El Niño 2026-2027 ka një mundësi të paprecedentë për t’u shndërruar në një nga më të fuqishmit e regjistruar ndonjëherë.

Administrata Kombëtare Oqeanike dhe Atmosferike e SHBA-së (NOAA) ka bërë të ditur se ekziston një probabilitet prej 63% që temperaturat e sipërfaqes së Paqësorit të kalojnë 2 gradë Celsius mbi normalen gjatë këtij viti.

Analistët e bankës Goldman Sachs parashikojnë se një “Super El Niño” mund të rrisë çmimet globale të lëndëve të para ushqimore me rreth 15.8%, ndërsa në Eurozonë çmimet e ushqimeve mund të rriten mesatarisht me 1.3%.

Sipas tyre, ndikimi i plotë do të ndihet gradualisht dhe mund të zgjasë deri në vitin 2028, për shkak të cikleve të mbjelljes, korrjes dhe shpërndarjes së produkteve bujqësore.

Ekspertët theksojnë se El Niño nuk prek të gjitha rajonet njësoj. Disa zona pritet të përballen me thatësira të rënda, ndërsa të tjera me përmbytje, duke dëmtuar prodhimin bujqësor dhe zinxhirët e furnizimit.

Vendet me të ardhura më të ulëta, që tashmë janë goditur nga rritja e kostove si pasojë e konfliktit me Iranin, konsiderohen më të rrezikuarat.

Sipas ekonomistëve, kombinimi i motit ekstrem, mungesës së plehrave kimike dhe kostove më të larta të energjisë mund të ushtrojë presion të fortë mbi inflacionin global dhe të detyrojë bankat qendrore të mbajnë normat e interesit në nivele të larta për më gjatë.