Opozita kërkon dorëheqjen e kryebashkiakut të Beogradit pas sulmit ndaj këshilltares: Šapiç “i padenjë për funksionin”

Opozita serbe ka kërkuar dorëheqjen e kryebashkiakut të Beogradit, Aleksandar Šapić, një ditë pas incidentit ku ai akuzohet se sulmoi fizikisht këshilltaren e lëvizjes Kreni-promeni, Tanja Micić, duke i thyer hundën. Siç njofton Nova.rs, opozita e konsideron Šapićin “të padenjë për funksionin e kryebashkiakut të Beogradit”, pas ngjarjes që tronditi opinionin publik mbrëmjen e së dielës.

Reagime të ashpra kanë ardhur edhe nga studentët në bllokadë, të cilët, sipas Nova.rs, deklaruan se “mbrojtja e grave nuk është slogan fushate”, duke dënuar dhunën ndaj këshilltares. Edhe organizata të grave e kanë dënuar incidentin, ndërsa qytetarët në rrjetet sociale kanë kërkuar përgjegjësi ligjore, shkruan portali B92.

Stefan Simić, këshilltar i Lëvizjes së Qytetarëve të Lirë, reagoi ashpër, duke u kërkuar autoriteteve që ndaj kryebashkiakut të veprohet si ndaj çdo qytetari tjetër të akuzuar për dhunë — me hetim të rregullt ligjor dhe, nëse ka bazë, me ndalim. Sipas B92, ai kërkoi gjithashtu testim të menjëhershëm të Šapićit për alkool dhe substanca psikoaktive, duke theksuar se dhuna duhet dënuar pa dallim përkatësie politike.

Incidenti ndodhi mbrëmjen e 28 shtatorit në Bežanijska kosa, në Novi Beograd, ku Micić po shëtiste me bashkëshortin dhe qenin e saj. Sipas Kreni-promeni, Šapić iu afrua, e akuzoi se i kishte sjellë njerëz para shtëpisë dhe, pas një debati verbal, e goditi në hundë. Policia e mori kryebashkiakun në stacionin e Novi Beogradit, por e liroi pas pak kohe — çka nxiti protesta të Kreni-promeni para stacionit të policisë. Vetë Šapić e mohoi goditjen, duke thënë se “nuk e godita, e shtyva për t’u mbrojtur”.

Ndërkohë, lideri i Kreni-promeni, Savo Manojlović, ka kërkuar që prokuroria të nisë procedim penal ndaj Šapićit dhe t’i caktojë paraburgim, ndërsa ka thirrur qytetarët të mblidhen para Prokurorisë së Novi Beogradit në shenjë presioni për përgjegjësi ligjore.