PARIS – Franca përballet me vështirësi financiare, rrezikon objektivin për uljen e deficitit në 2026

– Franca rrezikon të mos përmbushë objektivin për uljen e deficitit buxhetor këtë vit, për shkak të përkeqësimit të pritshmërive për rritjen ekonomike, raportoi “Reuters”.

Ministri i Financave, Roland Lescure, deklaroi sot se qeveria mund të detyrohet të marrë masa shtesë për kursime.

Në një përditësim të situatës financiare para deputetëve, Lescure tha se qeveria ka ulur parashikimin e rritjes ekonomike për vitin 2026 nga 0,9% në 0,7%, pas një fillimi të dobët të vitit dhe ndikimit të luftës në Iran.

Rritja më e ngadaltë ekonomike, po ndikon në të ardhurat nga taksat, ndërsa qeveria është detyruar të ofrojë mbështetje financiare, për disa sektorë të prekur nga rritja e kostove të energjisë, si pasojë e konfliktit.

“Është e qartë se objektivi ynë për një deficit publik prej 5% të Prodhimit të Brendshëm Bruto (PBB) është tashmë i vështirë për t’u arritur. Do të bëjmë gjithçka që është e mundur, për t’iu afruar sa më shumë këtij objektivi”, tha Lescure pas takimit me ligjvënësit.

Ministri i Buxhetit, David Amiel, bëri të ditur se do të nevojiten edhe 3 miliardë euro kursime ose ngrirje shpenzimesh shtesë, për të përballuar shpenzimet e paparashikuara.

Kjo vjen, përveç 6 miliardë eurove të masave emergjente kursimi të zbatuara më herët.

Edhe shpenzimet e qeverive lokale përbëjnë një rrezik për objektivin e deficitit.

Ministria e Financave vlerëson se ato mund të tejkalojnë planin me rreth 2 miliardë euro.

Sipas Lescure, gjysma e dytë e vitit, do të jetë vendimtare për financat publike të Francës.

Vështirësitë buxhetore e bëjnë edhe më të komplikuar hartimin e buxhetit për vitin 2027, i cili duhet të paraqitet në shtator.

Shqetësimet po rriten se borxhi publik i Francës, që arrin rreth 3,5 trilionë euro, mund të vazhdojë të rritet, ndërsa vendi i afrohet zgjedhjeve presidenciale të vitit të ardhshëm. /