Pas shtatë vitesh, Ian Somerhalder zbulon pse u tërhoq nga aktrimi

Aktori Ian Somerhalder, i njohur për rolet në serialet “The Vampire Diaries” dhe “Lost”, ka zbuluar për herë të parë arsyen e vërtetë pse u largua nga aktrimi në vitin 2019.

Në një intervistë në podcastin “Haley on the Go”, 47-vjeçari e cilësoi vendimin e tij si “të sinqertë dhe disi të debatueshëm”, duke thënë se gjithçka lidhej me mënyrën se si u trajtua seriali i tij “V Wars” nga Netflix.

Somerhalder tregoi se kishte investuar pothuajse një vit punë në projekt, madje kishte zhvendosur familjen në Ontario të Kanadasë për xhirimet.

“Kur pashë versionin përfundimtar, nuk ishte as i shikueshëm. U thashë drejtuesve se nuk doja ta vendosja emrin tim mbi të dhe se isha gati t’ua ktheja milionat që kisha marrë,” tha ai.

Sipas aktorit, Netflix i lejoi atij dhe partnerit të tij producent të merrnin kontrollin krijues të serialit, por pa financim shtesë. Për ta përfunduar projektin, ata siguruan mbi 6 milionë dollarë nga burime të tjera dhe xhiruan materiale shtesë brenda vetëm gjashtë ditësh, një ritëm pune që, sipas Somerhalder, e çoi në spital.

Edhe pse “V Wars” pati sukses pas publikimit në dhjetor 2019, seriali u anulua pas sezonit të parë.

Aktori pretendon se anulimi nuk kishte të bënte me audiencën, por me konflikte mes drejtuesve të kompanisë.

“Pashë veten në pasqyrë dhe i thashë gruas sime: Jam 40 vjeç dhe nuk dua të kaloj dy vite të jetës sime duke punuar kaq shumë, që karriera ime të varet nga drejtues që merren me lojëra pushteti. Aty vendosa të largohem.”

Pas largimit nga Hollywood-i, Somerhalder dhe bashkëshortja e tij, aktorja Nikki Reed, u zhvendosën në një fermë në Kaliforni, ku janë përqendruar në sipërmarrje dhe projekte të tjera jashtë industrisë së filmit.

Megjithatë, ai la të kuptohet se një rikthim në ekran nuk është plotësisht i përjashtuar. Somerhalder zbuloi se ai dhe ekipi i tij kanë rimarrë të drejtat e “V Wars”, edhe pse pranoi se nuk e di nëse seriali do të mund të rikthehet ndonjëherë në televizion.