PD krijon avatarin rival të Diellës: Ajo 4 milionë, ky ka kushtuar vetëm 100 euro!

Partia Demokratike po zhvillon këtë të shtunë, më 30 maj, mbledhjen e Kuvendit Kombëtar, që vjen vetëm një javë pas rizgjedhjes së Sali Berishës në krye të kësaj force politike.

Punimet kanë nisur me mesazhin e një avatari të krijuar nga departamenti i IA-së në PD, i konceptuar si figurë digjitale e Gjergj Kastriotit-Skënderbeut. Duke ironizuar ministren virtuale për Prokurimet Publike, avatari Skënderbe tha në një videomesazh që ai kishte kushtuar vetëm 100 euro.

“Unë jam Skënderbeu. Jo Skënderbeu i Elisës, para se Elisa të inatosej me Skënderbeun e saj, As Skënderbeu i kullës së Edit në mes të Tiranës. Jam Gjergj Kastrioti-Skënderbeu, heroi kombëtar i shqiptarëve, europeisti i parë i këtyre trojeve. Në fakt, jam një avatar i krijuar nga Departamenti AI i Partisë Demokratike.

Ndryshe nga avatari i Ramës, Diella, që ka kushtuar milion euro, unë kam kushtuar vetëm 100 euro. Edi Rama po i kushton shumë Shqipërisë: që nga pushtimi otoman askush nuk i ka kushtuar më shumë këtij vendi të bekuar. Në fund, më lejoni që t’i uroj punë të mbarë Kuvendit Kombëtar të Partisë Demokratike. Le të jetë kjo besëlidhje, jo vetëm e Ripërtëritjes, por edhe e Anti-Vjedhjes!”, ishte mesazhi i avatarit të opozitës.

Më pas punimet e sotme vazhduan me miratimin e Komisionit që po drejton Kuvendin, si dhe Sekretariatin Teknik. Komisioni do të përbëhet nga Ivi Kaso në cilësinë e kryetarit, së bashku me Floriana Garon, Bardh Spahinë, Eliona Shkrelin dhe Nada Meçorpajn.

Po ashtu u transmetuan videomesazhe dhe u mbajtën fjalime nga përfaqësues të lartë të partive simotra europiane.

/tvklan.al