Persona të maskuar e të armatosur frikësojnë banorët përreth brezit kufitar shqiptar
Në brezin kufitarë me Shqipërinë tash e tutje do të ketë patrullime të përbashkëta të Policisë së Shqipërisë dhe të Kosovës, dhe do të shkëmbejnë informacione në baza ditore e sipas nevojës edhe më shpesh.
E gjitha kjo ngase natën e kaluar dy persona të dyshuar me maska në kokë dhe të armatosur, njëri me kallashnikov e tjetri me thikë, kanë kërkuar para nga disa banorë që po rrinin para një shitoreje në fshatin Orqushë, që ndodhet afër bredhit kufitar me Shqipërinë, shkruan KP.
Patrullimi i përbashkët ka të bëjë me dyshimin e bazuar se të dyshuarit mund të jenë nga fshatrat e shtetit shqiptar pranë brezit kufitar, ndërsa policia e Dragashit është zotuar të kryej hetime në territorin e komunës së Dragashit sepse tani për tani nuk dihet se kush janë autorët e këtij rasti.
Dy të armatosurit, për të krijuar frikë dhe panik, kanë shtënë me armë në drejtim të panjohur. Krismat kanë alarmuar banorët e fshatit të cilët janë mbledhur ndërsa të dyshuarit kanë ikur në drejtim të panjohur.
Policia në vendin e ngjarjes ka gjetur dhe sekuestruar katër gëzhoja të kallashnikovit.
Ndërkaq në vendkalimin kufitar afër fshatit Orqushë, vazhdon puna në mënyrë normale.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.