Plani i Rritjes, Koopman: Shqipëria dhe Mali i Zi janë më të përparuarit, pritet të arrijë 80%

Drejtori i Drejtorisë së Përgjithshme për Zgjerimin e Komisionit Evropian, Gert Jan Koopman gjatë fjalës së tij këtë të martë në Parlamentin Evropian deklaroi se që nga qershori zbatimi i reformave sipas Planit të Rritjes për Ballkanin Perëndimor është i lartë për Shqipërinë dhe Malin e Zi. Ai theksoi se pritet të arrijë rreth 80%. Ndër të tjera, Koopman shtoi se të dhënat tregojnë 50% për Maqedoninë e Veriut dhe 35% për Serbinë.

“Kur u takuam në janar, vumë re se, ndërsa po bëhej përparim, ai ishte i ngadaltë. Tani jam i lumtur që mund t’ju raportoj se rreth 90% e të gjitha hapave janë ose të arritura plotësisht ose janë në vazhdim, me 57% të arritura sipas vlerësimeve tona deri në qershor të këtij viti.

Duhet thënë se ka një divergjencë të konsiderueshme në të gjithë rajonin, me Malin e Zi dhe Shqipërinë që pritet të arrijnë nivele zbatimi prej 80%, gjë që pasqyron gjithashtu momentin e tyre shumë të rëndësishëm në rrugën drejt BE-së”, tha Koopman.

Sipas tij, Maqedonia e Veriut gjatë muajve të fundit ka përshpejtuar ndjeshëm angazhimin dhe e ka thelluar atë, dhe tani presin që shkalla e zbatimit të saj të kalojë 50%. Ai theksoi se RMV po e kap ritmin me shpejtësi.

“Serbia, e cila është në një nivel shumë më të ulët, ka treguar gjithashtu angazhim, duhet pranuar se është më selektiv, me një nivel realizimi prej rreth 35% dhe punë në 85% të hapave që janë në vazhdim. Kohët e fundit, Serbia i ka kushtuar shumë më tepër rëndësi zbatimit të Instrumentit”, shtoi Koopman.

Ai shtoi se Kosova po mbetet shumë prapa për shkak të bllokadave të brendshme politike që kanë penguar miratimin e legjislacionit të rëndësishëm.

“Megjithatë, që nga zgjedhjet e qershorit të këtij viti, shohim se Kosova po fillon të ndërtojë stabilitetin e nevojshëm institucional dhe për këtë arsye presim një shkallë më të lartë zbatimi”, tha Koopman.

Vendi që paraqet më shumë sfida është Bosnja dhe Hercegovina për shkak të bllokadave të saj të brendshme politike. Sipas Koopman, Komisioni tashmë i ka shkurtuar alokimet për Bosnjën dhe Hercegovinën dhe propozon, në radhë të parë, transferimin e këtyre fondeve në Departamentin e Këshillit Evropian të Inovacionit për Ballkanin Perëndimor në mënyrë që ai të qëndrojë në rajon.

I pyetur në lidhje me situatën e pagesave për Serbinë, Koopman tha se Komisioni ende po përcakton nëse përmbushet një nga dy nivelet e kushtëzimit, kushtet e përgjithshme që lidhen me sundimin e ligjit.

“Fakti që nuk kemi paguar deri më sot sugjeron që nuk ishim plotësisht të bindur se ky është vërtet rasti. Ne vazhdojmë ta monitorojmë këtë. Situata, siç e përshkroi dokumenti ynë jo-ligjor për sundimin e ligjit dhe gjithashtu raporti ynë i zgjerimit të vitit të kaluar, nuk është perfekte, është larg të qenit e kënaqshme, siç e dini dhe siç e ka theksuar edhe parlamenti”, tha Koopman.

Ai shtoi se Komisioni pa gjithashtu se vendi ka filluar t’i adresojë disa nga situatat problematike më seriozisht gjatë muajve të fundit, dhe në fakt, kohët e fundit janë ndërmarrë disa hapa të rëndësishëm, përfshirë fundjavën e kaluar, fillimin e punës së këshillit REM, mbikëqyrësit të medias.