Promovimi i produkteve “Made in Albania”, hapet Panairi i Tekstilit dhe Veshjeve

Panairi i Tekstilit dhe Veshjeve hapi siparin e tij me datë 4 qershor, me synimin për të vendosur një traditë në këtë kategori panairi.

Ajo që u evidentua që në fillim të hapjes së tij, ishin stendat e Kosovës, të cilat nën siglën “ Kosovo Fashion” i ofruan të gjithë të pranishmëve pjesëza nga puna e tyre tekstile në veshje pune, mbrëmje, sportive apo edhe ceremoniale.

I pranishëm në event, ministri i Zhvillimit Ekonomik dhe Turizmit, Arben Ahmetaj, i cili u shpreh se industria e tekstileve po gjeneron vende të reja pune, duke ndikuar kështu në zhvillimin ekonomik të vendit.

“ Gjatë 18 muajve të qeverisë Rama është përmbysur struktura e eksporteve, në favor të prodhimeve, të cilat ofrojnë një zhvillim të qendrueshëm ekonomik, e tani me jo vetëm nga nafta e produktet minerale. Kemi një fokus të ri te tekstilet dhe këpucët. Është e rëndësishme ajo që kompanitë sapo thanë, që kanë kërkesa në rritje dhe kanë punësuar më tepër punonjës, kjo tregon rrugën e duhur të kësaj industrie në rritje”- tha Ahmetaj, gjatë hapjes së djeshme.

Ai shtoi edhe se mbështetja e dhënë për këtë sektor ka qenë me paketën mbështetëse për manifakturën me 32 masa, 28 prej të cilave janë zbatuar.

Hapja e këtij panairi u ideua në formën e një spektakli, ku krahas të gjitha të ekspozuara, pati edhe kërcime dhe një sfilatë të vërtetë mode, me veshje të stiluara nga stilistja shqiptare Bora Kokëdhima, nën siglën “Fifteen Shades of Grey”.

Panairi që do të qëndrojë i hapur deri më 6 qershor në Muzeun Historik Kombetar, iniciativë e cila lindi në vazhdën e nismave të profilizuara në dobi të sektorëve që sigurojnë zhvillim ekonomik afatgjatë e nxisin bashkëveprim ndërkombëtar, organizuar nga Klik Expo Group.