Propozimet e SHBA për luftën, Rubio: Presim sot përgjigje nga Irani

Sekretari i Shtetit i SHBA-së, Marco Rubio ka deklaruar këtë të premte se Shtetet e Bashkuara presin sot një përgjigje nga Irani mbi një propozim për luftën. Ndër të tjera, ai shtoi se shpreson që të jetë një ofertë serioze.

“Duhet të dimë diçka sot. Nuk e kemi marrë ende këtë, deri në orën e fundit. Sistemi i tyre është ende shumë i fragmentuar dhe gjithashtu jofunksional, kështu që kjo mund të shërbejë si pengesë”, tha ai.

Diplomati më i lartë amerikan vuri në dukje se shpresa është që përgjigja iraniane të jetë diçka që mund t’i fusë në një proces serioz negociatash.

Rubio vuri në dukje gjithashtu raportimin gjatë natës se Irani ka krijuar ose po përpiqet të krijojë një agjenci që do të kontrollojë trafikun në Ngushticë, duke thënë se kjo do të ishte shumë problematike, në fakt do të ishte e papranueshme.