Protesta e qytetarëve dhe reforma territoriale, Berisha, thirrje për pjesëmarrje

Protestat ishin kryefjalë e komunikimit online të kreut të Partisë Demokratike Sali Berisha me qytetarët.

Kreu i selisë blu tha se tubimet nuk janë thirrur nga forca që drejton, por garantoi pjesëmarrjen dhe mbështetjen e demokratëve.

“Protesta që po zhvillohet nuk është e thirrur nga Partia Demokratike, por të garantoj se pjesëmarrja e Partisë Demokratike është e fuqishme në këtë protestë dhe do të jetë dhe ne e ndjekim me shumë interes, me shumë vëmendje dhe do bëjmë gjithçka për mbështetjen e saj.”

Kryetari i Partisë Demokratike u ndal edhe te reforma territoriale ku kundërshtoi vendimin e shumicës qeverisëse për mbylljen e punimeve të komisionit përkatës.

Sipas tij, Partia Demokratike kishte vendosur të merrte pjesë në këtë proces pas kërkesave të ardhura nga qytetarë të zonave të ndryshme të vendit.

“Pas konsultave të gjëra në të cilat bipartizane, qytetarët e të gjithë spektrit politik, demokratë dhe socialistë dhe të paparti demaskuan njëzëri reformën e shkuar të Edi Ramës. Edi Rama vendosi të mbyllë punimet e komisionit, të tërhiqet dhe votojë në mënyrë të njëanshme raportin e Maznikut, i cili s’ishte paraqitur në komision. Ai bën gjithçka për një konfrontim.”

Duke ju përgjigjur pyetjeve të qytetarëve online, Berisha tha se pas përfundimit të proceseve të brendshme në parti, PD do të përcaktojë drejtimin e saj politik.

“Ne do të riformulojmë axhendën tonë në funksion të zgjedhjeve të ardhshme, në funksion të suksesit të protestës dhe të largimit të Edi Ramës,” deklaroi ai.