Qeveria e Serbisë miraton dekretin për blerjen e shtëpive në fshat për nënat me fëmijë

Qeveria e Serbisë në mandat teknik miratoi në mbledhjen e sotme Dekretin për kushtet dhe mënyrën e realizimit të së drejtës për mjete monetare për blerjen e shtëpisë së fshatit me oborr për shkak të lindjes së fëmijës. Me këtë u mundësua që nënat e fëmijëve deri në një vjeç të paraqesin kërkesa për blerjen e shtëpisë së fshatit me oborr, duke përdorur të dyja masat e mbështetjes shtetërore për zgjidhjen e çështjes së strehimit që zbatohen nga Ministria për Kujdesin ndaj Familjes dhe Demografisë dhe Ministria për Kujdesin ndaj Fshatit.

Sipas njoftimit të Qeverisë, nënat e fëmijëve deri në një vjeç mund të marrin mbështetje për blerjen e një shtëpie fshati me oborr, vlera e tregut e së cilës nuk i kalon 2,5 milionë dinarë, dhe kështu ta zgjidhin çështjen e strehimit pa investim shtesë parash. Deri në 1,5 milionë dinarë mund të përfitohen përmes Programit të Ministrisë për Kujdesin ndaj Fshatit për blerjen e shtëpisë së fshatit me oborr, ndërsa deri në 1 milionë dinarë përmes subvencionit të Ministrisë për Kujdesin ndaj Familjes dhe Demografisë, që jepet për blerjen e pronës së parë për shkak të lindjes së fëmijës.

Ministrja për Kujdesin ndaj Familjes dhe Demografisë në mandat teknik, Jelena Žarić Kovačević, deklaroi se duke lidhur këto dy masa krijohet kushti që nënat, me blerjen e shtëpisë së fshatit me oborr, ta zgjidhin përgjithmonë çështjen e strehimit. “Duam të përmirësojmë strukturën e popullsisë në zonat rurale, të nxisim zhvillimin demografik dhe t’u ofrojmë familjeve mbështetje më konkrete në momentin kur po zgjidhin një nga çështjet më të rëndësishme jetësore”, tha ajo.

Dy ministritë nënshkruan më 28 gusht të këtij viti një Memorandum Bashkëpunimi me synimin për të lidhur të dyja masat e mbështetjes shtetërore. Qeveria e Republikës së Serbisë më 11 shtator miratoi ndryshimet e Dekretit për përcaktimin e Programit të dhënies së mjeteve të pakthyeshme për blerjen e shtëpisë së fshatit me oborr në territorin e Serbisë për vitin 2026, me të cilat e drejta për të marrë pjesë në konkurs iu zgjerua edhe nënave të fëmijëve të porsalindur, pa kufizim moshe për nënën.

Burimi: Danas