Qeveria ndryshon rregullat për shërbimet jashtë vendit, klasifikimi i hoteleve sipas kategorive dhe mbulimi i shpenzimeve

Këshilli i Ministrave ka miratuar një vendim të ri të propozuar nga ministri i Financave, i cili rregullon në mënyrë të detajuar procedurat, shpenzimet dhe kompensimin financiar për punonjësit e njësive të qeverisjes së përgjithshme që dërgohen me shërbim ose trajnime afatshkurtra (jo më shumë se një muaj) jashtë Shqipërisë.

Vendimi i ri shfuqizon zyrtarisht Vendimin e Këshillit të Ministrave nr. 870, datë 14.12.2011, duke vendosur rregulla të reja llogaridhënieje, kontrolli buxhetor dhe procedura më strikte për miratimin e udhëtimeve zyrtare.

Përcaktimi i hoteleve sipas kategorive të punonjësve

Për herë të parë vendoset një ndarje e qartë e kufirit të lejuar për nivelin e strukturave hoteliere ku mund të akomodohen zyrtarët publikë gjatë shërbimeve jashtë vendit:

Përjashtim nga ky rregull bëjnë punonjësit e Gardës së Republikës që shoqërojnë personalitetet (të cilët qëndrojnë në të njëjtin hotel me personalitetin), si dhe rastet e veprimtarive ndërkombëtare ku rezervimi menaxhohet drejtpërdrejt nga organizatorët apo kur një hotel me më shumë yje ofron tarifë më të ulët.

“Në fillim të çdo viti, njësitë e qeverisjes së përgjithshme, në përputhje me fondet buxhetore të disponueshme, hartojnë dhe miratojnë programin vjetor të veprimtarive që do të zhvillohen jashtë vendit.”, thuhet në vendim.

Dieta ushqimore dhe shpenzimet e trajnimeve

Vendimi përcakton normat e shpenzimeve ushqimore ditore sipas shteteve dhe grupeve të funksioneve. Për rastet e trajnimeve afatshkurtra, masa e dietës ushqimore vendoset fikse në 40 euro/USD në ditë, me kusht që të mos mbulohet nga pala pritëse.

Rrethanat madhore dhe kompensimi financiar

Sipas rregullave të reja, biletat e avionit dhe akomodimi duhet të sigurohen drejtpërdrejt nga institucioni, ndërsa shpenzimet e tjera i kalojnë punonjësit në llogari bankare si paradhënie përpara nisjes. Pas kthimit, bëhet barazimi financiar mbi bazën e faturave fizike ose elektronike.

Vendimi mbron buxhetin e institucionit në rastet e ndërprerjes së udhëtimit për rrethana madhore dhe të paparashikuara (si sëmundje e menjëhershme, anulim i aktivitetit nga organizatori, fatkeqësi natyrore apo probleme sigurie), ku shpenzimet e kryera deri në atë moment njihen nga buxheti i shtetit.

Përveç aparateve shtetërore, këto rregulla u rekomandohen për zbatim edhe enteve publike jobuxhetore, ndërmarrjeve shtetërore dhe shoqërive tregtare ku shteti zotëron mbi 50% të kapitalit.