Qeveria zbuloi 2,1 milionë euro honorarë për këngëtarët e pavarësisë, por jo sa kushtoi Guetta

Qeveria publikoi sot raportin financiar të festimeve të 35-vjetorit të pavarësisë, siç njofton televizioni 24 duke iu referuar agjencisë shtetërore të lajmeve MIA. Zëdhënësja Marija Miteva, në një konferencë të përbashkët për shtyp me drejtorin e Llotarisë Shtetërore, Aleksandar Klimovski, prezantoi raportin prej mbi 80 faqesh të përgatitur nga kompania “Stardust”, e ngarkuar me realizimin e projektit.

Sipas raportit, programi u realizua plotësisht me 18 ngjarje në 13 qytete, me hyrje falas për të gjithë qytetarët, me një kosto totale prej 340.509.749 denarësh (rreth 5,5 milionë euro). Shpenzimet ndahen në pesë kategori kryesore: honorarë për artistët dhe interpretuesit — 129,3 milionë denarë (rreth 2,1 milionë euro); shpenzime produksioni — 96,2 milionë denarë; shpenzime logjistike — 58,5 milionë denarë; marketing — 2,8 milionë denarë; dhe honorarë për bashkëpunëtorët — 53,5 milionë denarë, shkruan 24.mk.

Mbajtësi i programit ishte karvani kombëtar muzikor-skenik “Silno svetnal den”, i cili kaloi nëpër 11 qytete — Ohër, Manastir, Veles, Krushevë, Kumanovë, Shtip, Prilep, Kërçovë, Kavadar, Probishtip dhe Shkup — duke angazhuar 41 interpretues vokalë maqedonas, 20 balerinë e aktorë dhe një orkestër prej 15 muzikantësh. Më 1 shtator u mbajt koncerti “José Carreras dhe Macedonia All Stars”, ku tenori me famë botërore performoi me 10 interpretues vendas dhe Filarmoninë e Maqedonisë, ndërsa në kuadër të konceptit “Më e mira nga Maqedonia” u organizuan tri koncerte në Strumicë, Shkup dhe Tetovë, raporton televizioni 24.

Kulmi i festimeve ishte spektakli qendror i David Guetta-s me projektin “Monolith show”, i mbajtur më 8 shtator në Arenën Kombëtare “Todor Proeski” në Shkup, i ndjekur sipas raportit nga rreth 50 mijë spektatorë. Por tarifa e saktë që kushtoi ylli francez nuk u zbulua, thekson gazeta Fokus në artikullin e sotëm.

Publikimi i raportit vjen pas presionit në rritje për transparencë: më 24 shtator deputeti Oliver Spasovski kërkoi llogaridhënie për shpenzimet e festimeve, ndërsa debati u ndez nga çështja e kontratës mes Llotarisë Shtetërore dhe kompanisë “Stardust”. Miteva deklaroi se publiku meriton pasqyrë të plotë se çfarë u realizua, cili ishte koncepti i programit dhe si u shpërndanë mjetet financiare.