Rafuna: Nëse taksat për naftën nuk ulen për të gjithë, të lehtësohen së paku dy sektorë

Kryetari i Odës Ekonomike të Kosovës, Lulzim Rafuna, ka kërkuar uljen e akcizës ose të Tatimit mbi Vlerën e Shtuar për derivatet e naftës, në mënyrë që të lehtësohen kostot e qytetarëve dhe të bizneseve. Duke folur në “Përballje Podcast” në Telegrafi, ai tha se Oda ia kishte adresuar këtë kërkesë Qeverisë që në pranverë, pas rritjes së çmimeve të derivateve.

“Kemi kërkuar që të ulet akciza apo edhe tatimi mbi vlerën e shtuar, për shkak se TVSH-ja është tatim i konsumatorit”, deklaroi Rafuna, siç njofton Telegrafi. Sipas tij, një ndërhyrje e tillë do të ndikonte drejtpërdrejt në uljen e çmimit të derivateve.

Nëse lehtësimi fiskal nuk mund të zbatohet për të gjithë qytetarët e Republikës së Kosovës, Rafuna tha se Qeveria duhet të përqendrohet së paku në sektorë të caktuar të ekonomisë, duke veçuar bujqësinë. Mbështetja për këtë sektor, theksoi ai, duhet të ofrohet në kohën e duhur, pasi punimi i tokës dhe mbjelljet lidhen me afate sezonale.

Krahas bujqësisë, kreu i Odës Ekonomike veçoi edhe transportin e mallrave si sektor ku nevojiten lehtësime fiskale. Sipas raportimit të Telegrafi, ulja e TVSH-së ose e akcizës për karburantet e përdorura në transport do të ulte kostot që reflektohen në çmimin përfundimtar të produkteve për konsumatorët.